Renato "RP" Peralta, PANAGBALBALIW: ASUG TI PAGUILIAN!

Ayayatek nga Annac quen cacabsat, Cablaaw!

Sadino ti cayatmo a PAGTURUNGAN ti paguilian? Ania ti cayat mo a pagtungpalan wenno pagbanagan na? Ammom cadi nga agcacapsut ti ina a daga gapu cadaguiti nagduduma a saquit a mang parparigat quencuana? Pinadas mo cadin nga inamiris ti puon quen gapu dagitoy agsasamusam a rigat? Adda pay cadi nabatbati a namnama tapnon magun-od ti inana? Wen ADDA. Ti baro a tulag ipasimudaagna ti baro a namnama ni Filipino, POSIBLE MAMATICA!

Ita ngarud, AGRIINGCA! AGRIINGCA! AGRIINGCA! Bumangon quen agtignayca Allingagem asug ti ina a daga. Il-iliwen na a maquita ti pudno a panagbalbaliw daguiti annacna.

Sangalenta ngarud baro a tulag ti nabaetanta. Ti isu amin a puso, panunot, pigsa quen ricna quet pagbiaganta a maipaay ti isasalun-at tay a padapada.

AMMOEM TI REBBENGEM O AGTUTUBO: laglagipem ti inca panagpaREHISTRO tapno masigurado a caramanca nga agbotos iti umay nga election. Daytoy ti rebbengen ti umili. Isu't umana nga addang quen pangrugian ti aniaman a tignay iti panagbalbaliw ti paguilian.
Laglagipem o agtutubo, sica ti namnama iti AGDAMA a dalan ti naraniag a MASACBAYAN.

ILABAN MO TI CALINTEGAM O NATAENGAN:
Sigoradoem coma a nacamaldit ti nagan mo ti listaan daguiti botante. Cadaguiti napalpalabas naawanan ti gundaway quen kalintegan nga agbotos gapu ta inawan, pinucaw, pinunas, guinatang/guinamrud daguiti NAY ti nagan da.
MAPANCA ngarud quet penkem a naimbag nga awan problema. Saanca nga agbubuteng. Ilaban mo ti calintegam..

ITAN ti aldaw ti panagbalbaliw, inton bigat maladaw. Mangrugi ti ISIP,PUSO quen RICNA. No mapabaro ti panunot, mapabaro met ti pnnakaawat quen prinsipyo, sumaruno ti naimbag nga ugali quen nalinteg nga aramid quet sumirib tayo.

Guraen tayo ti quinucunniber quen sinisuitic nga aramid. Saan tayo nga paabac itit sileng ti pirac a mangted laeng ti apagapaman a ragsac ngem mangitunda ti naunday nga rigat. Dica paalilaw iti ubbaw a sasao. Pagbiagam ti quinapudno quet ti pudno waywayaan na ti Nacion tayo..

Gupden tayon ti maulit-ulit a camali quen agsubli-subli a saquit a mangparparigat ti umili...ucsuben tayon ti napalalot daan quen mansa-mansa nga arwaten quet ikawes tayon ti baro, nasudi quen macasalibucag banglo na nga cawes. Salacniban ta dayaw mo ta ti dayaw ken maullo quen matequed, SAAN A MAILACO OENNO MAGATANG. Salimetmetam naimbag a sursuro.

Sublianan tay ti nabalitocan a panpanonot! Nadalus a consencia, napudno nga aramid, daguitoy ti mangbuquel ti AYAT!

Ayat ti mangbalbaliw ti lubong, saan a sileng ti pirak ubbaw a sasao, pammarpardaya't pada a tao quen quinocosit nga aramid.

Agcaycaysa tayo ngarud a mangisacnap daytoy baro a tulag. Isu't bisqued natarnaw a sirmata a mangipasimodaag baro a agsapa. Pasinguedanta babaen ti panagcarcararag iti Apo, ta no awan ti tulong na quet awan pulos maaramid tayo. Isu't agaramid babaen ti nacascasdaaw nga wagas. Awan narigat quen naricut quencuana..

PILIPINAS, AGBIAGCA! PARANIAGEM RIMAT MO CAS MAYSA PERLAS ITI DAYA